أخبار عاجلة

تحلطم صايمة كويتية (25)

مساء اخر يوم اتحلطم فيه معاكم بالشهر الفضيل، اللي ان شاء الله ينعاد عليكم اسنين وابنين، ان شاء الله انكون كلنا واولكم انا، قعدنا مع روحنا وهذبناها وسوينا مسح زلزالي حق كل شاردة وواردة غلط سويناها وخذينا عهد جدام الله انه ما نرد لها.
تحلطم اليوم راح يكون بين ايدياتكم وانا خارج الأراضي الكويتية ابدي اجازتي مع حبايب قلبي وروحي عيالي، عقب لوية وتعب الدراسة، طبعا الحين الكل في وضع الاستعداد للسباق الايماني اللي بينطلق من بيوتكم وينتهي بمدخل بيوت الرحمن علشان تقطون حمولكم على ربكم، وترفعون ايدياتكم اللي يعلها ما تمسها النار وتدعون باللي بقلبكم واللي ان شاء الله ما يهل هلال العيد الا وكل دعاويكم متحققة، بس اللي اتمناه ان يستمر هذا الماراثون عقب ما يخلص شهر الخير، وما ترد ريمة لعادتها القديمة، يعني ما يرد الحش والبوق والحسد والغيرة وتبحلق العين على اللي عند الغير، ووايد من المظاهر السلبية اللي تكتسح وطني الغالي طول السنة، وتقل بنسبة %80 بهالشهر طمعا بالمغفرة وكسب الأجر.
فكلنا بصوت واحد الحين خل نقول: اللهم يا واحد يا احد يا فرد يا صمد احفظ الكويت من كل شر وفتنة وبواق وبلاع بيزة ومرتزق، اللهم يا عزيز يا معز عزّ والدنا وحبيبنا سمو الأمير الشيخ صباح، وطوّل بعمره، اللهم امسح على قلب الريال الكويتي وحط عقله براسه، اللهم يا مجيب المضطر إذا دعاه، ندعوك أن لا تخلي عانس بالكويت إلا زوجتها، ولا زوجة إلا سعدتها، ولا عقيمة إلا ترست حضنها عيال ولا رقلة الا ركدتها، وخليتها اتهيع بمكانها، وابعد عن بنات الكويت الملاقة الباسجة والزمط اللي ذابلين جبدنا فيه.
وآخر المتمة عيدكم مبارك وعساكم من العايدين والفايزين.

روابي البناي


Source link

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق