منى زكي الصندوق الأسود صعب | جريدة الأنباء

قالت الفنانة منى زكي: «أنا اتخضيت لما اكتشفت إن بقالي 4 سنين بعيدة عن السينما، ومش مصدقة، أنا كان واحشني شغلي أوي في السينما، وطول الوقت كنت بدور على حاجة كويسة أشتغلها، وأهو الحمد لله عوضت غيابي وراجعة بالصندوق الأسود».

وأضافت منى، في تصريحات تلفزيونية مع الإعلامية لميس الحديدي: «أعتقد أن صعوبة الفيلم في أن معظمه معتمد على التلقائية، ومحمود كامل كان بيشجعنا نكون تلقائيين حتى في حركة الكاميرا عشان فيه عنف، فكان لازم كل حاجة تكون تلقائية».

وتابعت: «إحنا صورنا وخلصنا الفيلم من قبل ما كورونا يظهر في العالم كله، وهيتعرض الفيلم يوم 28 أكتوبر، ويا رب يعجب الناس، ويكون حاجة كويسة، وأنا مبسوطة جدا بالتعامل مع محمد فراج ومصطفى خاطر، وهما هايلين جدا، لأن لما بيكون معاكي أشخاص موهوبة بيطلع العمل بشكل كويس جدا».

واستكملت: «وقت كورونا كنا بنصور مسلسل «تقاطع طرق»، وملحقناش نعرض في رمضان، لأن كان عندنا ممثلين بره مصر، ولازم ييجوا مصر ومكنش في طيران، وبالتالي مقدرناش نكمل، فقعدت نص أزمة كورونا بشتغل والنص التاني قافلة على نفسي».