تحلطم صايمة كويتية (6)

يا هلا ومرحبا، بشروني ان شاء الله الكل في وضع الصمود، انتو بس يبدي البطن يغروج تذكروا «دولكة» الفيمتو الباردة واللي صاف يمها صحن كبة البطاط وخبز العروق اللي ناطرينكم على نار ويغنون لكم: هلا بك يا نسم روحي ويا لبيه.
الهبة السائدة في الديرة هالأيام اهي «زحمة الحملات»، كل من كح سووله حملة، وكل من عطس سووله حمله، انا اليوم همن بتحلطم وبسوي حمله بسميها «عفية ما نبي»، بقول فيها واللي يسلمكم عفية ما نبي قراض بفلانة اللي سوت غبقه ونادت النون وما يعلمون وعطتج احسينوه وعياله، عفية ما نبي فيلم speed نسخة كويتية قبل الاذان اللي عارف نفسه بيفطر بره البيت خل يطلع قبلها بساعة، ما له داعي التبتون والهرنات والفلشرات وكأن عندكم حالة طارئة واخر شي تخافون ان ثومة التشريب احد ياكلها قبلكم، عفية ما نبي الأسئلة اللي تذبل الجبد مالت كل سنة وانتو تسألون يا شيخ المؤذن قال الله اكبر وفخذ الديايه بحلجي اقطه ولا اكمل؟ ولا يا شيخ نفسي قالتلي اقبل زوجتى بنهار رمضان صيامي جائز ولا لا؟ عفية ما نبي ذبلة الجبد بالإنستغرام وربعه بصور صحونكم وقفاشكم وقلاصاتكم اليديدة ترا والله درينا انكم IN والسنع يقطر منكم وما كو شي طايفكم، واخر شي واهو الأهم، عفيه ما نبي يمر علينا هالشهر واحنا على طمام المرحوم ما كو يديد دخل حياتنا.

روابي البناي